Medisinfri behandling

Fastlegen og behandlarar i spesialisthelsetenesta vil saman med deg vurdere om dette er eit eigna tilbod for deg.

Du vil bli innkalla til samtale for å kartlegge tilstanden din og behova dine. Vi vil saman vurdere om eit medikamentfritt tilbod er forsvarleg for deg, slik at den psykiske lidinga og plagene dine ikkje blir forverra når du tar imot tilbodet. Du får også meir informasjon om behandlingstilbodet. Vi vil snakke med deg om motivasjon og mål for behandlinga, kartlegge psykiske plager, fysisk helse og legge opp til eit godt samarbeid med familie og lokale hjelpeinstansar.

Dersom du som pasient skal lykkast med eit medikamentfritt behandlingstilbod er det viktig at du er motivert og klar for å jobbe aktivt med din psykiske liding og problem i kvardagen din.

Eit medikamentfritt behandlingstilbod bygger ofte på prinsippet om «recovery», eller «tilfriskning» på norsk. Alle skal kunne leve eit tilfredsstillande liv. Ein person med ei alvorleg psykisk liding skal kunne ha ein god og meiningsfull kvardag.

Du og behandlar skal jobbe som likeverdige partnarar for å nå mål som er viktige for deg. Du er ekspert på deg sjølv og livet ditt, og behandlaren er ekspert på faget sitt. Erfaringane og synspunkta dine er viktige, og dei skal takast omsyn til. Samarbeidet blir basert på openheit og tillit. Målet er at du får kunnskapar, ferdigheiter og støtte som gir deg høve til å ta ansvar for eigne val og ta kontroll over ditt eige liv.

Etter avslutta medikamentfri behandling skjer vidare oppfølging enten hos fastlege og kommunen eller i andre delar av spesialisthelsetenesta.

Det er viktig at du bruker det du har lært i behandlinga. Dei fleste personar skal under og ved avslutta behandling ha fått utarbeidd ein eigen plan for å førebygge og meistrar tilbakefall.

Denne planen inneheld ei beskriving av tiltak og tenester du har behov for av ulike instansar, rutinar og tidspunkt for evaluering, kven som er ansvarleg for dei ulike tilboda, og kven som eventuelt skal vere koordinatoren din.

Kriseplan

Du kan også avtale ein kriseplan om nyttige tiltak i kritiske fasar, med ei beskriving av varselsignal, strakstiltak og kven som bør kontaktast.

Ein kriseplan skal hjelpe deg å:

• oppdage tidlege teikn på forandring
• planlegge korleis du kan stoppe ei negativ utvikling
• fortelje deg korleis du på best mogleg måte kan søke hjelp

Planen skal vere skriftleg og blir utarbeidd i samarbeid med hjelpeapparatet og dine næraste. Hjelpeapparatet forpliktar seg til å følge denne planen.

Eksempel på kriseplan frå Nasjonalt kompetansesenter for psykisk helsearbeid (PDF)